लेख विवरण

नयाँ दिल्ली (एजेन्सी) – अफगानिस्तान राष्ट्रिय क्रिकेट टोलीका पूर्व तीव्र गतिका बलर शापूर जादरान गम्भीर बिरामी परेका छन्। ३८ वर्षीय जादरान हाल नयाँ दिल्लीस्थित एक अस्पतालको सघन उपचार कक्ष (ICU) मा भर्ना भएर उपचार गराइरहेका छन्।

जादरानलाई 'हेमोफागोसाइटिक लिम्फोहिस्टियोसाइटोसिस' (HLH) नामक दुर्लभ र ज्यान लिने खतरा भएको रोग लागेको पुष्टि भएको छ। यो रोगले शरीरको प्रतिरक्षा प्रणालीलाई अत्यधिक सक्रिय बनाउँछ, जसका कारण शरीरका भित्री अंगहरू जस्तै कलेजो, बोन म्यारो र स्प्लीनमा गम्भीर असर पुग्छ।

जादरानका भाइ गमार जादरानका अनुसार शापूरलाई सन् २०२५ को अक्टोबरदेखि नै स्वास्थ्यमा समस्या देखिन थालेको थियो। अफगानिस्तानका चिकित्सकहरूको सल्लाहमा उनलाई थप उपचारका लागि भारत ल्याइएको हो। सुरुमा उपचारपछि निको भएर अस्पतालबाट डिस्चार्ज भए पनि २० दिनपछि पुनः संक्रमण दोहोरिएकाले उनलाई फेरि अस्पताल भर्ना गरिएको हो।

"उनको शरीरभरि संक्रमण फैलिएको छ र यसले मस्तिष्कमा समेत असर गरेको एमआरआई रिपोर्टले देखाएको छ," गमारले जानकारी दिएका छन्।

बायाँ हाते तीव्र गतिका बलर शापूर जादरानले सन् २००९ देखि २०२० सम्म अफगानिस्तानका लागि ४४ एकदिवसीय र ३६ टी-२० अन्तर्राष्ट्रिय खेल खेलेका छन्। सन् २०१५ को विश्वकपमा स्कटल्याण्डविरुद्ध अफगानिस्तानलाई पहिलो ऐतिहासिक जित दिलाउन उनले निर्णायक भूमिका खेलेका थिए।

अहिले विश्वभरका क्रिकेट प्रेमी र सहकर्मी खेलाडीहरूले उनको शीघ्र स्वास्थ्य लाभको कामना गरिरहेका छन्।