लेख विवरण

अहमदाबाद (एजेन्सी) – मुम्बई इन्डियन्सका युवा ब्याट्सम्यान तिलक वर्माले आइपिएल (IPL) को इतिहासमा एक अभूतपूर्व कीर्तिमान कायम गरेका छन् । सोमबार राति गुजरात टाइटन्सविरुद्धको खेलमा उत्कृष्ट ब्याटिङ गर्दै तिलकले पहिलो इनिङ्समा पाँचौं नम्बर वा सोभन्दा तलको क्रममा ब्याटिङ गर्न आएर शतक प्रहार गर्ने विश्वकै पहिलो खेलाडीको उपलब्धि हासिल गरेका हुन् ।

अहमदाबादको नरेन्द्र मोदी स्टेडियममा भएको खेलमा तिलकले मात्र ४५ बलमा अविजित १०१ रनको योगदान दिए । उनको यो विस्फोटक इनिङ्समा ८ चौका र ७ छक्का समावेश थियो ।

सनथ जयसूर्याको १८ वर्ष पुरानो कीर्तिमानको बराबरी

तिलकले यो शतकसँगै मुम्बई इन्डियन्सका लागि सबैभन्दा छिटो शतक प्रहार गर्ने सनथ जयसूर्याको १८ वर्ष पुरानो कीर्तिमानको पनि बराबरी गरेका छन् । सन् २००८ मा जयसूर्याले चेन्नई सुपर किंग्सविरुद्ध ४५ बलमै शतक प्रहार गरेका थिए । अहिले तिलकले पनि सोही गतिमा रन जोड्दै मुम्बईको इतिहासमा आफ्नो नाम स्वर्ण अक्षरले लेखाएका छन् ।

ब्याटिङ क्रममा नयाँ इतिहास

सामान्यतया आइपिएलमा शतकहरू माथिल्लो क्रमका ब्याट्सम्यान (ओपनर वा तेस्रो नम्बर) बाट हुने गर्छ । तर, तिलकले टोलीको ४४ रनमै ३ विकेट खसेको कठिन परिस्थितिमा आएर यो सफलता पाएका हुन् । यसअघि पहिलो इनिङ्समा पाँचौं नम्बरमा आएर कुनै पनि ब्याट्सम्यानले शतक बनाउन सकेका थिएनन् । यसअघिको उच्च स्कोर ८९ रन मात्र थियो ।

मुम्बई इन्डियन्सका लागि शतक बनाउने आठौं खेलाडी

तिलक वर्मा मुम्बई इन्डियन्सको जर्सीमा शतक प्रहार गर्ने आठौं खेलाडी बनेका छन् । यसअघि सनथ जयसूर्या, सचिन तेन्दुलकर, रोहित शर्मा, लेन्डल सिमन्स, सूर्यकुमार यादव, क्यामरुन ग्रीन र क्विन्टन डी ककले मात्र मुम्बईका लागि यो सफलता प्राप्त गरेका थिए ।

यो उपलब्धिले २३ वर्षीय तिलकको क्षमता र दबाबपूर्ण अवस्थामा खेल्ने कौशललाई पुनः पुष्टि गरेको छ । मुम्बईले उनको यसै शतकको मद्दतले निर्धारित २० ओभरमा १९९ रनको चुनौतीपूर्ण स्कोर खडा गरेको थियो ।