लेख विवरण

एन्टिगुआ । वेस्ट इन्डिजमा जारी घरेलु प्रथम श्रेणी क्रिकेट (वेस्ट इन्डिज च्याम्पियनसिप) अन्तर्गत ट्रिनिडाड एण्ड टोबागो र लिभार्ड आइल्याण्ड्सबीचको खेल पिच 'खतरनाक' भएको ठहर गर्दै रद्द गरिएको छ। एन्टिगुआस्थित सर भिभियन रिचर्ड्स स्टेडियममा जारी खेलको तेस्रो दिन अम्पायरहरूले पिचको व्यवहार अप्रत्याशित र खेलाडीका लागि असुरक्षित भएको भन्दै खेल रोकेका हुन्।

खेलको दोस्रो इनिङमा लिभार्ड आइल्याण्ड्सका ब्याटर जेरेमिया लुइसलाई जेडेन सिल्सको एउटा बाउन्सर बलले हेलमेटमा लागेको थियो। बल पिचमा परेपछि अनपेक्षित रूपमा उछालिएको थियो, जसले लुइसलाई मैदानमै ढालेको थियो। उनलाई तत्कालै मैदानबाट बाहिर लगेर अस्पताल भर्ना गरिएको छ। हाल उनको अवस्था स्थिर रहेको र कन्कसन (टाउकोको चोट) परीक्षण भइरहेको जनाइएको छ।

यस खेलमा वेस्ट इन्डिजका युवा तीव्र बलर जेडेन सिल्सले घातक बलिङ गरिरहेका थिए। खेल रद्द हुनुअघि उनले विपक्षी टोलीको सातै विकेट लिन सफल भएका थिए। १७.३ ओभर बलिङ गर्दै उनले ३४ रन खर्चेर ७ विकेट लिएका थिए। पिच खतरनाक घोषित भएर खेल रद्द भएपछि सिल्सले एउटै इनिङमा १० विकेट लिने दुर्लभ कीर्तिमान बनाउने अवसर गुमाएका छन्।

मैदानको क्युरेटरसँगको छलफलपछि अम्पायरहरूले पिचलाई तत्काल मर्मत गर्न नसकिने र खेल जारी राख्न असुरक्षित भएको निष्कर्ष निकालेका थिए। क्रिकेट वेस्ट इन्डिज (CWI) ले खेललाई बराबरी (Draw) को रूपमा घोषणा गर्दै दुवै टोलीलाई तेस्रो दिनसम्मको प्रदर्शनका आधारमा अंक बाँडेको छ।