लेख विवरण

जनकपुरधाम, मेन्स मधेश क्रिकेट लिग सिजन-२ (२०२६) अन्तर्गत आज सम्पन्न रोमाञ्चक खेलमा धनुषाले महोत्तरीमाथि ७ विकेटको सानदार जित दर्ता गरेको छ। महोत्तरीले दिएको १०४ रनको लक्ष्यलाई धनुषाले १७.२ ओभरमा मात्र ३ विकेट गुमाएर सहजै पूरा गर्‍यो।

महोत्तरीको ब्याटिङ: कृष साहको घातक बलिङसामु धरमरायो इनिङ्स

यसअघि टस जितेर पहिले ब्याटिङ गर्ने निर्णय गरेको महोत्तरीले निर्धारित २० ओभरमा ८ विकेट गुमाउँदै १०३ रन मात्र बनाउन सक्यो। महोत्तरीका लागि प्रारम्भिक ब्याटर रवि कुमार सिंहले सर्वाधिक ५१ रनको योगदान दिए। उनले ३५ बल खेल्दै ५ चौका र २ छक्का प्रहार गरे पनि अन्य ब्याटरबाट बलियो साथ पाउन सकेनन्।

महोत्तरीका अर्का ओपनर मोहम्मद सरफराज अन्सारीले ६ रन जोडे भने राज कुमार सहनीले १० रन र राजिव कुमार सदाले १३ रन बनाए।

महोत्तरीलाई सस्तैमा समेट्न धनुषाका बलर कृष साहले घातक बलिङ गरे। उनले आफ्नो ४ ओभरको स्पेलमा १५ डट बल फाल्दै मात्र १६ रन खर्चेर महत्वपूर्ण ३ विकेट लिए। त्यस्तै, रुपेश यादवले २, तथा अभिजित मण्डल र आयुष यादवले १–१ विकेट हात पारे। कप्तान विशाल सुशलिङले किफायती बलिङ गर्दै ४ ओभरमा मात्र १६ रन दिए।

धनुषाको जवाफी ब्याटिङ: मयन र कप्तान विशालको परिपक्व प्रदर्शन

१०४ रनको सामान्य लक्ष्य पछ्याएको धनुषाले उत्कृष्ट सुरुवात गर्‍यो। ओपनर मयन यादवले ४५ बलमा ४ चौका र २ छक्काको मद्दतले ४९ रनको इनिङ्स खेल्दै जितको आधार तय गरे। अर्का ओपनर तथा विकेटकिपर हिमान्शु दत्तले ३५ बलमा २७ रन जोडे।

मध्यक्रममा ब्याटिङ गर्न आएका कप्तान विशाल सुशलिङले १६ बलमा २ चौका र १ छक्का प्रहार गर्दै नटआउट २० रन बनाएर टोलीलाई जितको रेखा पार गराए। अखिलेश ठाकुर ७ रनमा नटआउट रहे।

महोत्तरीका बलर अभिषेक तिवारी र रमेश सहनीले १–१ विकेट लिए पनि टोलीलाई हारबाट जोगाउन सकेनन्।

संक्षिप्त स्कोरकार्ड:

• महोत्तरी: १०३/८ (२० ओभर)

  रवि कुमार सिंह ५१, राजिव कुमार सदा १३; कृष साह ४-०-१६-३, रुपेश यादव ४-०-२९-२

• धनुषा: १०७/३ (१७.२ ओभर)

  मयन यादव ४९, हिमान्शु दत्त २७, विशाल सुशलिङ २०*; रमेश सहनी ४-०-१८-१

• नतिजा: धनुषा ७ विकेटले विजयी।