लेख विवरण

पोखरा, चौथो गण्डकी टि२० क्रिकेट प्रतियोगिता २०२६ अन्तर्गत आज सम्पन्न खेलमा कास्कीले लमजुङमाथि ८ विकेटको निकै सहज र सानदार जित दर्ता गरेको छ। लमजुङले दिएको ३८ रनको झिनो लक्ष्यलाई कास्कीले मात्र २.४ ओभरमा २ विकेट गुमाएर पूरा गर्‍यो।

लमजुङको इनिङ्स: कास्कीका बलरसामु ताशको पत्ता झैं ढल्यो ब्याटिङ

यसअघि टस जितेर पहिले ब्याटिङ गर्ने निर्णय गरेको लमजुङ कास्कीका बलरहरूको घातक बलिङसामु निरिह देखियो। लमजुङले ९.१ ओभरमा मात्र ३७ रन जोड्दा आफ्ना सबै विकेट गुमायो। टोलीका लागि भीषण श्रेष्ठले १० रन बनाउनु बाहेक अन्य कुनै पनि ब्याटरले दोहोरो अंकमा रन जोड्न सकेनन्।

कप्तान करुण सिंह कुँवर, राजु भुसाल, बसन्त बोहरा, अभिषेक पौडेल र दिपिन सुवेदी खाता नै नखोली शून्य रनमा आउट भए।

लमजुङलाई सस्तैमा समेट्न कास्कीका विश्वास पराजुलीले घातक बलिङ गरे। उनले ३.१ ओभरमा १५ डट बल फाल्दै मात्र ११ रन खर्चेर ४ महत्वपूर्ण विकेट लिए। त्यस्तै, सौरभ सिद्दिकीले ३ ओभरमा १६ रन खर्चेर ३ विकेट चट्काए भने कृपेश पौडेलले मात्र १ ओभर बलिङ गर्दै १ रन दिएर ३ विकेट हात पारे।

कास्कीको जवाफी ब्याटिङ: अनिकेतको आक्रामक ब्याटिङ, २.४ ओभरमै जित

३८ रनको सामान्य लक्ष्य पछ्याएको कास्कीले विष्फोटक सुरुवात गर्‍यो। कास्कीका ओपनर अनिकेत गजुरेलले मात्र ९ बलमा १ चौका र २ छक्का प्रहार गर्दै अविजित २० रनको योगदान दिए। अभिनव शाह शून्य र दीपक माझी १ रनमा आउट भए पनि प्रमोद बास्तोलाले ३ बलमा ९ रन बनाउँदै टोलीलाई ओभर नसकिँदै जित दिलाए।

लमजुङका लागि सागर पौडेल र राजु भुसालले १–१ विकेट लिए पनि त्यो जितका लागि पर्याप्त थिएन।

प्लेयर अफ दि म्याच:

खेलमा ११ रन खर्चेर ४ विकेट लिँदै लमजुङको ब्याटिङ लाइनअप ध्वस्त पारेका कास्कीका बलर विश्वास पराजुली खेलको 'प्लेयर अफ दि म्याच' घोषित भए।

संक्षिप्त स्कोरकार्ड:

• लमजुङ: ३७/१० (९.१ ओभर)

  भीषण श्रेष्ठ १०, राजन कुँवर १; विश्वास पराजुली ३.१-१-११-४, कृपेश पौडेल १-०-१-३, सौरभ सिद्दिकी ३-०-१६-३

• कास्की: ४१/२ (२.४ ओभर)

  अनिकेत गजुरेल २०*, प्रमोद बास्तोला ९*; सागर पौडेल १-०-११-१

• नतिजा: कास्की ८ विकेटले विजयी।