लेख विवरण

काठमाडौँ । शनिबार वेम्बली रंगशालामा भएको सनसनीपूर्ण प्लेअफ फाइनलमा मिडल्सब्रोलाई १-० ले पराजित गर्दै हल सिटी ९ वर्षपछि इंग्लिस प्रिमियर लिगमा फर्किएको छ। कडा प्रतिस्पर्धात्मक खेलको इन्जुरी समयको अन्तिम मिनेटमा ओली म्याकबर्नीले गरेको गोल नै हल सिटीका लागि निर्णायक बन्यो।

यो जितसँगै हल सिटीको शीर्ष डिभिजनको ९ वर्ष लामो प्रतिक्षा समाप्त भएको छ। रोचक कुरा के छ भने, ठीक एक वर्षअघि मात्रै हल सिटी गोल अन्तरको आधारमा तेस्रो डिभिजन (लीग वन) मा घटुवा हुनबाट जोगिएको थियो।

खेलपछि स्काई स्पोर्ट्ससँग कुरा गर्दै नायक म्याकबर्नीले भने: "हामीलाई थाहा थियो कि हामीले एउटा मौका पाउनेछौँ र मलाई लागिरहेको थियो कि त्यो गोल गर्न मेरै भाग्यमा लेखिएको थियो। यति ढिलो गोल होला भन्ने सोचेको थिइनँ, तर यो भावना अद्भुत छ। म हिजो राती खुसीले सुत्न समेत सकेको थिइनँ।"

मिडल्सब्रो टोली वास्तवमा यो फाइनल खेल्न पाउने स्थितिमा थिएन। सेमिफाइनलमा साउथेम्प्टनले मिडल्सब्रोलाई हराएको थियो। तर, साउथेम्प्टनले मिडल्सब्रोको बन्द प्रशिक्षणमा जासुसी गरेको प्रमाणित भएपछि उसलाई प्रतियोगिताबाट निष्कासित गरियो र मिडल्सब्रोलाई पुन: मौका दिइयो। साउथेम्प्टनले गरेको पुनरावेदन पनि गत हप्ता खारेज भएको थियो।

अन्तिम समयमा अप्रत्याशित मौका पाएर पनि पराजित भएपछि मिडल्सब्रोका मुख्य प्रशिक्षक किम हेलबर्गले भावना सम्हाल्न गाह्रो भएको बताए। उनले भने: "पछिल्लो दुई हप्ता भावनात्मक रूपमा मेरो जीवनकै सबैभन्दा कठिन रह्यो। यो थकाइलाग्दो थियो, तर हारको लागि यो कुनै बहाना हुन सक्दैन। हामी खेलका लागि तयार थियौँ, हलले गोल गर्‍यो र हामी उनीहरूलाई बधाई दिन्छौँ।"

यो प्लेअफ फाइनललाई विश्व फुटबलकै सबैभन्दा बढी आर्थिक फाइदा हुने (रिचेस्ट वन-अफ म्याच) खेल मानिन्छ। यो जितसँगै प्रिमियर लिगमा बढुवा भएको हल सिटीले भविष्यमा कम्तीमा २७ करोड अमेरिकी डलर (करिब ३६ अर्ब नेपाली रुपैयाँ) बराबरको आम्दानी सुनिश्चित गरेको छ।

सन् २०१५-१६ को सिजनमा हल र मिडल्सब्रो सँगै प्रिमियर लिगमा उक्लिएका थिए र एकै सिजनपछि सँगै रेलिगेसनमा परेका थिए। त्यसयता ९ वर्षसम्म दुवै टोली च्याम्पियनसिपमै संघर्षरत थिए।

अत्यधिक गर्मीका बीच वेम्बलीमा भएको खेलको पहिलो हाफ निकै सुस्त रह्यो। पहिलो हाफको अन्तिम समयमा म्याकबर्नीको हेडर मिडल्सब्रोका डिफेन्डरलाई लाग्दै क्रसबारमा ठोकिएपछि हल सिटी अग्रता लिनबाट चुकेको थियो।

दोस्रो हाफमा खेल केही आक्रामक बने पनि दुवै टोलीका गोलकिपरले खासै ठूलो चुनौतीको सामना गर्नु परेन। खेल अतिरिक्त समय र पेनाल्टी सुटआउटतर्फ धकेलिने निश्चित जस्तै देखिँदा खेलको ९५औँ मिनेट (इन्जुरी समयको पाँचौँ मिनेट) मा चामत्कारिक ट्विस्ट आयो।

यु हिराकावाको क्रसलाई मिडल्सब्रोका गोलकिपर सोल ब्रिनले ठीकसँग पन्च गर्न सकेनन् र रिबाउन्ड बलमा म्याकबर्नीले प्रहार गर्दै बललाई जाली चुमाए। गोल गरेलगत्तै म्याकबर्नीले आफ्नो जर्सी फुकालेर खुसी मनाएका थिए।

यस हारसँगै वेम्बली रंगशालामा मिडल्सब्रोको 'अनलकी' इतिहास कायमै रहेको छ। मिडल्सब्रोले वेम्बलीमा खेलेका आफ्ना पछिल्ला ६ वटै खेलमा पराजय भोगेको छ।