लेख विवरण

काठमाडौँ — पोर्चुगिज फुटबल स्टार क्रिस्टियानो रोनाल्डोले खेलकुद मिडियाको क्षेत्रमा ठुलो लगानी गरेका छन्। अल-नास्रबाट खेलिरहेका भेट्रान फरवार्ड रोनाल्डोले ब्राजिलियन स्पोर्ट्स मिडिया कम्पनी 'लाइभमोड'को अन्तर्राष्ट्रिय शाखा 'लाइभमोड टिभी'मा ठुलो हिस्सा सेयर खरिद गरेका हुन्।

यो लगानीसँगै लाइभमोडको भगिनी संस्था तथा लोकप्रिय युट्युब च्यानल काजेटीभीले आगामी २०२६ फिफा विश्वकपका सबै १०४ खेलहरू ब्राजिलमा नि:शुल्क र फोर के क्वालिटीमा अनलाइन प्रसारण गर्ने घोषणा गरेपछि यसले विश्वभर चर्चा कमाएको छ।

के हो काजेटीभी?

सन् २०२२ मा ब्राजिलका प्रख्यात युट्युबर तथा स्ट्रिमर कासिमिरो मिगुएलले लाइभमोडसँगको सहकार्यमा यो च्यानल सुरु गरेका हुन्। परम्परागत टेलिभिजन च्यानलहरूलाई चुनौती दिँदै डिजिटल माध्यममा फड्को मारेको यो च्यानलले यसअघि २०२२ को कतार विश्वकप, फिफा महिला विश्वकप, ओलम्पिक गेम्स र फिफा क्लब विश्वकपका खेलहरू सफलतापूर्वक स्ट्रिमिङ गरिसकेको छ।

सन् २०२५ मा मात्रै युट्युबमा ३.७ अर्ब भन्दा बढी भ्युज पाएको यस च्यानलले आगामी विश्वकपमा खेलहरू मात्र नभई पर्दा पछाडिका दृश्यहरू, सांस्कृतिक कार्यक्रमहरू र युवा पुस्तालाई लक्षित गर्दै अन्तरक्रियात्मक सेसनहरू पनि प्रस्तुत गर्नेछ।

मुख्य विशेषता: यस साझेदारी अन्तर्गत रोनाल्डोको गृहदेश पोर्चुगलमा पनि 'लाइभमोड टिभी' मार्फत पोर्चुगलका खेलहरू सहित विश्वकपका महत्वपूर्ण ३४ खेलहरू युट्युबमा नि:शुल्क हेर्न पाइनेछ।

रोनाल्डोको व्यावसायिक कदम

४१ वर्ष पुगिसकेका रोनाल्डो फुटबल इतिहासकै पहिलो अर्बपति खेलाडी हुन्, जसको कुल सम्पत्ति १.४ अर्ब डलरभन्दा बढी छ। रियल इस्टेट, होटल, स्वास्थ्य र आर्टिफिसियल इन्टेलिजेन्समा लगानी गरिसकेका रोनाल्डोले यसपटक डिजिटल मिडिया रोजेका हुन्। यद्यपि, उनको यो लगानीको आर्थिक विवरण भने सार्वजनिक गरिएको छैन।

आफ्नो नयाँ लगानीबारे बोल्दै रोनाल्डोले भनेका छन्, "खेलकुदले जीवन बदल्न सक्छ। हाम्रो उद्देश्य युट्युब र सबै सामाजिक सञ्जालहरू मार्फत ठुला खेलकुद प्रतियोगिताहरूको पहुँच र संलग्नता बढाउँदै खेल इकोसिस्टमलाई थप समृद्ध बनाउनु हो, ताकि सबैले सहजै खेलको आनन्द लिन सकून्।"

डिजिटल माध्यम र क्रिएटर कल्चरलाई जोड दिने काजेटीभीको यो मोडलले परम्परागत टिभी ब्रोडकास्टरहरूको एकाधिकारलाई ठुलो चुनौती दिएको खेल विज्ञहरू बताउँछन्। फिफा आफैँले पनि युवा दर्शकहरूलाई आकर्षित गर्न यस डिजिटल मोडललाई पूर्ण रूपमा प्रोत्साहन गरेको छ।