लेख विवरण

काठमाडौं — क्रिकेट एक्सीलेन्स सेन्टर (सिइसी) पल्सर यू–१४ टोलीले चन्द्रागिरी यू–१४ टी–२० क्रिकेट प्रतियोगिता २०२६को उपाधि जितेको छ। बिहीबार भएको रोमाञ्चक फाइनल भिडन्तमा काठमाडौं क्रिकेट एकेडेमी यू–१४ टोलीलाई २५ रनले पराजित गर्दै सिइसी पल्सर च्याम्पियन बनेको हो।

सिइसी पल्सरको जितमा उत्कृष्ट अलराउन्ड प्रदर्शन गरेका कुशल बिसी 'प्लेयर अफ दि म्याच' घोषित भए।

कुशल र भीमको ब्याटिङले बलियो योगफल

चन्द्रागिरी मैदानमा सिइसी पल्सरले टस जितेर पहिले ब्याटिङ गर्ने निर्णय गरेको थियो। टोलीले १७.४ ओभरमा सबै विकेट गुमाएर १२३ रनको चुनौतीपूर्ण योगफल खडा गर्‍यो।

पल्सरका लागि मध्यक्रमका ब्याटर कुशल बिसीले आक्रामक ब्याटिङ गर्दै मात्र १५ बलमा ३ चौका र २ छक्काको मद्दतले २७ रन जोडे। यस्तै, भीम बहादुर शाहीले १४ बलमा ४ चौका र १ छक्का प्रहार गर्दै २३ रनको योगदान दिए। ओपनर प्रशन जैसीले १६ र जन ओलिकले १४ रन बनाए।

काठमाडौं क्रिकेट एकेडेमीका बलर गौतम कुमार पटेलले घातक बलिङ गर्दै ४ ओभरमा ३४ रन खर्चेर ४ विकेट चट्काए। यस्तै, आयुष शाहीले ४ ओभरमा १ मेडनसहित मात्र १७ रन दिएर ३ विकेट र रिदम बोगटीले १ विकेट लिए।

डेभिड र कुशलको धारिलो बलिङसामु काठमाडौं निरिह

१२४ रनको लक्ष्य पछ्याएको काठमाडौं क्रिकेट एकेडेमीको सुरुवात राम्रो हुन सकेन। टोली १८.५ ओभरमा ९८ रनमै अलआउट भयो।

काठमाडौंका लागि ओपनर ऋशु शाह सुवेदीले २८ बलमा ५ चौकाको मद्दतले सर्वाधिक २७ रन बनाए। त्यस्तै कप्तान जीवन बुढाले १६ बलमा २२ रन (३ चौका) जोड्दै इनिङ्स उकास्ने प्रयास गरे पनि अन्य ब्याटर चल्न सकेनन्।

काठमाडौंको इनिङ्स ध्वस्त पार्ने क्रममा सिइसी पल्सरका बलर डेभिड घर्तीले उत्कृष्ट बलिङ गर्दै ४ ओभरमा २१ डट बल फाल्दै मात्र १२ रन दिएर ३ महत्वपूर्ण विकेट लिए। कुशल बिसीले ३.१ ओभरमा ११ रन खर्चेर २ विकेट तथा दिपेन्द्र धामीले ३.५ ओभरमा २४ रन दिएर ३ विकेट लिएपछि पल्सरले २५ रनको सानदार जित सुनिश्चित गर्‍यो। ईशान केसीको नाममा १ विकेट रह्यो।

संक्षिप्त स्कोरकार्ड