लेख विवरण

काठमाडौं, १७ जेठ। नेपाली महिला राष्ट्रिय क्रिकेट टोलीले इतिहासकै सबैभन्दा खराब नतिजा हात पारेको छ ।

आइतबार एसियन गेम्स छनोटको खेलमा वरियतामा नेपाल भन्दा २१ स्थान पछि रहेको चीनसँग पराजित भएको छ । 

अन्तर्राष्ट्रिय क्रिकेट परिषद(आइसिसी) को पछिल्लो वरियतामा नेपाल २१औं तथा चीन ४२औं स्थानमा छ ।

चीनसँगको तेस्रो ट्वान्टी २० अन्तर्राष्ट्रिय भेटमा अपराजित नेपालले चौथो खेलमा पहिलो हार बेहोरेको हो । चीनसँगको हारसँगै नेपाली महिला टोली एसियन गेम्सका लागि छनोट हुन सकेन ।

मलेसियाको बायोमास ओभलमा तेस्रो स्थानका लागि भएको खेलमा चीनसँग नेपाल डकवर्थ लुइस पद्दतीमा ५ विकेटले पराजित भएको हो । वर्षाले प्रभावित खेल ७ ओभरमा छोट्याइएको थियो । नेपालले ७ ओभरमा ५० रनको लक्ष्य दिएपनि डिएस मेथडमा चीनले ४३ रनको लक्ष्य पाएको थियो ।

चीनले अन्तिम बलमा ४३ रनको लक्ष्य ५ विकेट गुमाएर पूरा गर्यो । चीनका लागि २ ब्याटरले मात्र दोहोरो अंकमा स्कोर गरे पनि जितका लागि त्यो पर्याप्त भयो । नेपालका लागि रिया शर्माले २ तथा सिता राना मगरले १ विकेट आफ्नो नाममा गरे ।

त्यसअघि पहिले ब्याटिङ गरेको नेपालले तोकिएको ७ ओभरमा ५ विकेट गुमाएर ५० रन जोडेको थियो । तल्लोकूमकी ब्याट कविता कुवँरले १० बलमा २२ रनको सर्वाधिक इनिङ्स खेलेको खेलमा कप्तान इन्दु बर्माले ११ रन बनाइन् । नेपालका अन्य ब्याटरले दोहोरो अंकमा रन बनाउन सकेनन् ।