लेख विवरण

क्वालालम्पुर, १८ जेठ (जुन १) । मलेसियामा जारी 'दोस्रो आरटी गोल्डकप २०२६' को उपाधि एन पेनाङ एफसीले चुमेको छ। शाह आलमस्थित पानासोनिक स्टेडियममा भर्खरै सम्पन्न फाइनल खेलमा न्यू ब्वाइज एफसी जोहोरलाई ५–० को भारी गोल अन्तरले स्तब्ध पार्दै एन पेनाङले उपाधिमाथि कब्जा जमाएको हो।

सेमिफाइनलमा १२ गोलको वर्षा गरेको एन पेनाङले फाइनलमा पनि आफ्नो आक्रामक लयलाई निरन्तरता दिँदै एकपक्षीय जित निकाल्यो।

खेलको फेहरिस्त: सुरेशको चमक, आशिष र दीपकको गोल

खेलको सुरुवातदेखि नै न्यू ब्वाइजमाथि दबाब बनाएको एन पेनाङका लागि खेलको १४ औं मिनेटमा स्टार स्ट्राइकर सुरेश खत्रीले गोल गर्दै टोलीको खाता खोलेका थिए। त्यसको दुई मिनेट बित्न नपाउँदै (१६ औं मिनेटमा) सुरेश खत्रीकै उत्कृष्ट असिस्टमा आशिष लिम्बुले गोल गर्दै एन पेनाङको अग्रता २–० पुर्‍याए।

खेलको ३० औं मिनेटमा दीपक राजले टोलीका लागि तेस्रो गोल गरे भने ३७ औं मिनेटमा लहन सुब्बाले प्रहार गरेको बलले जाली चुमेपछि एन पेनाङ ४–० को सुरक्षित स्थितिमा पुग्यो। खेलको अन्त्यतिर एन पेनाङले थप एक गोल गर्दै ५–० को विशाल जितका साथ स्वर्ण ट्रफी सुनिश्चित गर्‍यो।

विजेताले पाए २२ हजार मलेसियन रिंगेट

उपाधिसँगै विजेता टोली एन पेनाङ एफसीले आकर्षक ट्रफीसहित २२,००० मलेसियन रिंगेट प्राप्त गरेको छ। उपविजेता बनेको न्यू ब्वाइज एफसी जोहोरले ट्रफी र ११,००० मलेसियन रिंगेटमा चित्त बुझाएको छ।

आयोजक आरटीएफसीका अनुसार प्रतियोगिताका विधागत उत्कृष्ट खेलाडीहरू (उत्कृष्ट गोलकिपर, मिडफिल्डर, डिफेन्डर, प्रशिक्षक र सर्वोत्कृष्ट खेलाडी) लाई पनि जनही ३०० मलेसियन रिंगेट र ट्रफीद्वारा पुरस्कृत गरिएको छ।

मलेसियामा रहेका हजारौँ प्रवासी नेपाली फुटबल प्रेमीहरूको भव्य उपस्थिति र हुटिङका बीच सम्पन्न यस प्रतियोगिताले नेपाली फुटबलको क्रेजलाई प्रवासमा समेत उकासेको छ।