लेख विवरण

काठमाडौँ, फिफा विश्वकप २०२६ को पूर्वसन्ध्यामा खेलिएको अन्तर्राष्ट्रिय मैत्रीपूर्ण फुटबल खेलमा पूर्व विश्व विजेता जर्मनीले सानदार जित दर्ता गरेको छ। आइतबार राति जर्मनीको मेन्जस्थित 'मेवा एरेना'मा भएको खेलमा घरेलु टोली जर्मनीले फिनल्याण्डलाई ४–० को फराकिलो गोल अन्तरले पराजित गरेको हो।

जर्मनीको एकतर्फी जितमा स्ट्राइकर डेनिज उन्दाभले दुई गोल गरे भने फ्लोरियन विर्ट्ज र जमाल मुसिएलाले १–१ गोल थपे। मुख्य प्रशिक्षक जुलियन नागेल्सम्यानको रणनीति र युवा खेलाडीहरूको उत्कृष्ट तालमेलका कारण जर्मनीले मैदानमा पूर्ण पकड जमाएको थियो।

खेलको मुख्य हाइलाइट्स:

• उन्दाभको हेडमार्फत सुरुवाती गोल: खेलको सुरुदेखि नै जर्मनीले फिनल्याण्डलाई कडा दबाबमा राखेको थियो। खेलको ३४ औँ मिनेटमा कप्तान जोसुवा किमिचको उत्कृष्ट कर्नर पासमा डेनिज उन्दाभले हेडमार्फत गोल गर्दै जर्मनीलाई १–० को सुरुवाती अग्रता दिलाए। पहिलो हाफमा जर्मनीले गोल गर्ने धेरै अवसरहरू सिर्जना गरे पनि फिनल्याण्डका गोलकिपर लुकास ह्राडेकीले केही उत्कृष्ट बचाउ गरेका थिए।

• दोस्रो हाफको सुरुमै विर्ट्जको गोल: दोस्रो हाफ सुरु भएको दोस्रो मिनेटमै (४७ औँ मिनेटमा) जर्मनीले अग्रता दोब्बर बनायो। डेनिज उन्दाभको पासलाई सदुपयोग गर्दै फ्लोरियन विर्ट्जले प्रहार गरेको सट सिधै गोलमा परिणत भयो।

• उन्दाभको दोस्रो गोल: खेलको ५६ औँ मिनेटमा जर्मनीले तेस्रो गोल थप्यो। यस पटक लेन्नार्ट कार्लको पासमा डेनिज उन्दाभले व्यक्तिगत दोस्रो गोल गर्दै खेललाई ३–० को बलियो स्थितिमा पुर्‍याए।

• मुसिएलाले गरे चौथो गोल: खेलको ६२ औँ मिनेटमा बायर्न म्युनिखका स्टार मिडफिल्डर जमाल मुसिएलाले गोल गरे। उनले अलेक्जान्डर पाभ्लोभिचको उत्कृष्ट असिस्टमा पेनाल्टी बक्स भित्रबाट गोल गर्दै जर्मनीलाई ४–० को फराकिलो जित दिलाए।

मैदानमा जर्मनीको पूर्ण दबदबा

खेलको तथ्याङ्क हेर्ने हो भने पनि जर्मनी पूर्ण रूपमा हाबी भएको देखिन्छ। जर्मनीले खेल अवधिभर ६० प्रतिशत बल आफ्नो नियन्त्रणमा राखेको थियो भने फिनल्याण्डको पोस्टमा २२ पटक सट प्रहार गरेको थियो, जसमध्ये ९ वटा प्रहार 'अन टार्गेट' थिए। अर्कोतर्फ, फिनल्याण्डले जर्मनीको रक्षापङ्क्ति तोड्न निकै संघर्ष गर्नुर्‍यो र खेलभरि एउटा पनि प्रहार 'अन टार्गेट' राख्न सकेन।

विश्वकप २०२६ सुरु हुन अब केही दिन मात्र बाँकी रहँदा जर्मनीले देखाएको यो लयले टोलीको मनोबल निकै उच्च बनाएको छ। विश्वकपअघिको आफ्नो अन्तिम वार्म-अप खेलमा जर्मनीले आगामी शनिबार संयुक्त राज्य अमेरिकाको सामना गर्नेछ।